युनिकोड
विभागीय डर्बीमा एपीएफलाई पराजित गर्दै त्रिभुवन आर्मी क्लब पुनः कतार एयरवेज सहिद स्मारक ए डिभिजन लिगको शीर्षस्थानमा उक्लेको छ। सातदोबाटोस्थित एन्फा मैदानमा भएको बिहीबार भएको खेलमा एपिएफ क्लबलाई २–१ गोल अन्तरले हराउँदै आर्मी पुनः शीर्षस्थानमा फर्केको हो।
बिहीबारै भएको पहिलो खेलमा सरस्वती युथ क्लबलाई ६–१ ले हराउँदै मछिन्द्र केही समय शीर्षस्थानमा उक्लेको थियो। अंकतालिकामा शीर्ष स्थानको आर्मीको २६ र दोस्रो स्थानको मछिन्द्रको २५ अंक छ। एक खेल कम खेलेको मनाङ मस्र्याङ्दी क्लबको १९ अंक छ।
पहिलो हाफमा लिएको अग्रतालाई जोगाउँदै आर्मीले जित हासिल गरेको हो। आर्मीको जितमा फेरि एकपटक मिडफिल्डर सन्तोष तामाङ नायक बने। सन्तोषले १६औं मिनेटमा गोल गर्दै आर्मीलाई अग्रता दिलाएका थिए।
सन्तोषले पेनाल्टी रिवाउन्डमा गोल गरेका थिए। कप्तान भरत खवासलाई रमेश दंगालले पेनाल्टी बक्समा लडाएपछि आर्मीले पेनाल्टी पाएको थियो। सन्तोषले गरेको पेनाल्टी प्रहारलाई एपिएफका गोलरक्षक राजु योगीले रोके पनि रिवाउन्डमा गोल गर्न सफल भएका थिए।
खेलको ३७औं मिनेटमा आशिष लामाको गोलबाट एपिएफले खेलमा बराबरी गरेको थियो। आकाश बुढामगरको कर्नरमा आशिषले हेडमार्फत गोल गर्न सफल भएका थिए। सन्तोषले ४२औं मिनेटमा फ्रिकिकमार्फत गोल गर्दै आर्मीको जित सुनिश्चित गरे।
११ खेलबाट पुछारको दोस्रो स्थानमा रहेको एपीएफको ५ तथा ४ अंक रहेको सरस्वती पुछारमा छ।
प्रतिक्रिया