चीनमा कोरोनाको प्रभाव घट्दा युरोपेली देशमा ह्वात्तै बढ्यो

केही दिनयताको तथ्यांक हेर्दा कोरोनाको उद्गमस्थल चीनले कोरोना नियन्त्रणमा उल्लेखनीय प्रगति गरेको देखिएको छ।

चीनमा कोरोना संक्रमित र मृत्यु दर अत्यन्त न्यून देखिन थालेको छ। गएको २४ घण्टामा चीनमा मात्र १६ व्यक्ति कोरोनाबाट संक्रमित बने, १२ को मृत्यु भयो।

तर सोही अवधिमा युरोपेली देशको संक्रमित दर र मृतक दरलाई हेर्दा कोरोना भाइरसले युरोप निकै प्रभावित बनेको देखिएको छ।

गत शुक्रबार मात्र विश्व स्वास्थ्य संगठनले कोरोनाको केन्द्रविन्दु अब चीन नभएर युरोप भएको बताएको थियो।

गत हप्ता नै चीनले आफ्नो देशमा कोरोनाको प्रभाव समाप्त भएको घोषणा गरेको थियो। चिनियाँ राष्ट्रपति आफैं कोरोनाको उद्गमस्थल वुहान पुगेका थिए।

गएको २४ घण्टामा युरोपका तीन देशमा मात्रै ४ सय ७९ जनाको मृत्यु भएको छ।

कोरोना भाइरसका कारण आइतबार एकै दिन इटालीमा ३६८ जनाको मृत्यु भयो। योसँगै इटालीमा कोरोनाका कारण ज्यान गुमाउनेको संख्या १८ सय ९ पुगेको छ। त्यहाँ संक्रमितको संख्या २४ हजार ७४७ पुगेको छ।

यस्तै स्पेनमा आइतबार एकै दिन ९७ संक्रमितको मृत्यु भयो। योसँगै त्यहाँ कोरोनाका कारण मृत्यु हुनेको संख्या २८८ पुगेको छ भने संक्रमितको संख्या ७ हजार ८४५ पुगेको स्पेनी स्वास्थ्य अधिकारीले जानकारी दिएका छन्।

आइतबारै फ्रान्समा २९ जनाको मृत्यु भयो। योसँगै फ्रान्समा कोरोना भाइरसका कारण मृत्यु हुनेको कुल संख्या १२७ पुगेको छ। त्यहाँ संक्रमितको संख्या ५ हजार ४२३ पुगेको छ।

यसैगरी बेलायतमा पनि आइतबार एकै दिन १४ जनाको मृत्यु भएको थियो।