नेपाली सेना र अमेरिकी सेनाको संयुक्त सैन्य अभ्यास ‘प्यासिफिक एन्जल २४’ सम्पन्न भएको छ।
भदौ ३० गतेदेखि काठमाडौँ, मकवानपुर र धादिङमा संयुक्त अभ्यास सञ्चालन भएको थियो।
नेपाली सेनासँगको अभ्यासका लागि अमेरिकी सेना भदौ २८ गते नेपाल आएको थियो।
नेपालस्थित अमेरिकी दूतावासका अनुसार अभ्यासका क्रममा खोज र उद्धार कार्य गर्न अमेरिकी वायुसेनाले विशेष रूपमा परिमार्जित गरेको विमान ‘एचसी–१३०जे कम्ब्याट किङ’बाट नेपाली सेनाले तालिम लिएको छ।
यो विमानलाई अमेरिकी सेनाले खोज तथा उद्धार र लडाइँमा खोजका लागि प्रयोग गर्ने गरेको छ। प्रतिघण्टा ५३७ किलोमिटरको गतिमा कुद्ने यो विमानले एक पटक इन्धन भरेपछि ८ हजार ३ सय ३४ किलोमिटरको दुरी पार गर्न सक्छ।
प्यासिफिक एन्जल अमेरिकी सेनाले हिन्द–प्रशान्त क्षेत्रका देशहरुमा नियमित रुपमा संचालन गर्दै आएको सैन्य अभ्यास हो। यसको उदेश्य मानवीय सहायता र विपद् व्यवस्थापनमा क्षमता बढाउनु रहेको अमेरिकी सेनाको भनाइ छ।
‘प्यासिफिक एन्जल २४’ अघिल्लो महिनादेखि सुरू भएको हो। हालसम्म पपुवान्युगेनी र भियतनाममा यो अभ्यास भइसकेको छ।
नेपालमा सन् २०१२ देखि यो सैन्य अभ्यास नियमितरुपमा हुँदै आएको छ।
Shares
प्रतिक्रिया