बालुवाटारमा ओलीसहित ६ जनाको छुट्टै बैठक

नेकपा सचिवालयको औपचारिक बैठक सकिएलगत्तै शुक्रबार प्रधानमन्त्री केपी शर्मा ओलीले सचिवालयका पाँच जना नेतासँग अलग्गै छलफल गरेका छन्।

औपचारिक बैठक सकेर अध्यक्ष पुष्पकमल दाहाल प्रचण्ड, वरिष्ठ नेता झलनाथ खनाल र प्रवक्ता नारायणकाजी श्रेष्ठ बालुवाटारबाट बाहिरिएपछि अध्यक्ष ओलीले वरिष्ठ नेता माधवकुमार नेपाल, उपाध्यक्ष वामदेव गौतम, सचिवालय सदस्य ईश्वर पोखरेल, रामबहादुर थापा र महासचिव विष्णु पौडेलसँग छुट्टै छलफल गरेका हुन्।

सत्तारुढ नेकपाको विवाद उत्कर्षमा पुगेका बेला शुक्रबार साढे ४ बजे बसेको सचिवालयको औपचारिक बैठक आधा घण्टामै सकिएको थियो।

सचिवालयको औपचारिक बैठकमा अध्यक्ष ओली र प्रचण्डमात्र बोलेका थिए भने अहिले देखिएको संकट समाधानका लागि प्रचण्डले तयार गरेको राजनीतिक प्रतिवेदन सबै सदस्यलाई बाँडिएको छ।

अर्को बैठक मंसिर ३ गते बस्ने गरी आजको बैठक टुंगिएपछि ओलीसहित ६ जनाले अनौपचारिक छलफल गरेका सचिवालयका एक सदस्यले बताए। मन्त्रीद्वय पोखरेल र थापा साँझ अबेरसम्म पनि बालुवाटारमै छन्।