पाकिस्तानका पूर्वप्रधानमन्त्री इमरान खानले पाकिस्तानको अवस्था बंगलादेशको भन्दा खराब भएको बताएका छन्।
भ्रष्टाचार मुद्दामा अदियाला जेलमा रहेका इमरान खानले सोमबार अदालतमा सुनुवाइका क्रममा पत्रकारहरूसँग पाकिस्तानमा पनि भित्रभित्र चरम असन्तुष्टि फैलिरहेको र अब विस्फोट हुन मात्र बाँकी रहेको बताएका हुन्।
इमरान खानले भने, ‘शेख हसिनाले जमात–ए–इस्लामीलगायत सबै प्रमुख विपक्षी दलहरूलाई दमन गरेकी थिइन्। पाकिस्तानमा पनि त्यस्तै भयो र भइरहेको छ। यहाँ पनि आन्तरिक असन्तुष्टि बढ्दै गएको छ। यो विस्फोट हुन मात्र पर्खिरहेको छ।’
अदालतको कोठामा उपस्थित पत्रकार बाबर मलिकका अनुसार इमरान खानले आफ्नो पार्टी तहरीक-ए-इन्साफ (पीटीआई) लाई आरक्षित सिट नदिएमा सडकमा उत्रने र विरोध गर्ने बताएका छन्।
पाकिस्तानको संसद्मा ७० सिट आरक्षित छन्। जसमध्ये ६० महिलालाई र १० गैरमुस्लिमलाई दिइन्छ। इमरान खान आफ्नो पार्टीलाई पनि त्यो सिटमा भाग चाहन्छन्।
सोमबार भ्रष्टाचार मुद्दामा सुनुवाइपछि पत्रकारहरूसँग अनौपचारिक कुरा गर्दै खानले सरकारले आरक्षित सिट दिनुपर्ने पीटीआईको मागलाई स्वीकार गरेर र प्रधानन्यायाधीश काजी फैज इसालाई म्याद थप्ने कुरामा अडिग भयो भने त्यसको विरोध गर्ने बताए।
Shares
प्रतिक्रिया