युनिकोड
आईसीसी टी–ट्वान्टी विश्वकप क्रिकेट प्रतियोगिता अन्तर्गत आइतवार भएको खेलमा अफगानिस्तानलाई हराउँदै न्यूजिल्यान्ड सेमिफाइनलप्रवेश गरेको छ।
सुपर-१२ अन्तर्गत समूह २ को खेलमा अफगानिस्तानलाई ८ विकेटको फराकिलो अन्तरले हराउँदै न्यूजिल्यान्डले सेमिफाइनल यात्रा तय गरेको हो।
न्यूजिल्यान्डले १ सय २५ रनको लक्ष्य १८.१ ओभरमा दुई विकेट गुमाउँदै भेट्टायो। न्यूजिल्यान्डको जितमा कप्तान केन विलियम्सनले सर्वाधिक ४० रन बनाए।
डेभोन कोनवेले ३६ रन र मार्टिन गुप्टिलले २८ रन बनाए। अफगानिस्तानका राशिद खान र मुजिब उर रहमानले समान एक-एक विकेट लिए।
यसअघि टस जितेर पहिले ब्याटिङ गरेको अफगानिस्तानले निर्धारित २० ओभरमा ८ विकेट गुमाएर १ सय २४ रन जोडेको थियो।
अफगानिस्तानका लागि नजिबुल्लाह जदरनले सर्वाधिक ७३ रन बनाए। उनले ४८ बल सामना गर्दै ६ चौका र ३ छक्का पनि हाने।
न्यूजिल्यान्डका लागि ट्रेन्ट बोल्टले सर्वाधिक ३ विकेट झारेका थिए। टिम साउथी २ विकेट झार्दा एडम मिल्ने, इश सोधी र जेम्स निशानले समान एक-एक विकेट झारे।
न्यूजिल्यान्डले समूह चरणका पाँचमध्ये चार खेलमा जित दर्ता गराएको छ। यसअघि चार खेलमा जित निकालेर पाकिस्तान यही समूहबाट सेमिफाइनल पुगिसकेको छ।
न्यूजिल्यान्डको जितले समान दुई-दुई खेल जितेका भारत र अफगानिस्तान विश्वकपबाट बाहिरिएका छन्।
भारतले सुपर-१२ को अन्तिम खेल नामिवियाविरुद्ध सोमबार खेल्दैछ। समूह-१ बाट इङ्ल्यान्ड र अष्ट्रेलिया पनि सेमिफाइनल पुगेका छन्।
प्रतिक्रिया