के एल दुगड समूहको मुख्य सहयोगमा मेडिकल कलेज कोहलपुरमा दैनिक चार सय जनालाई खाना खुवाउने कार्यक्रम सुरु गरिएको छ।
नेपालगन्ज मेडिकल कलेजको शिक्षण अस्पताल कोहलपुरमा भर्ना भएका बिरामी तथा तिनका आफन्तहरुलाई २ महिनासम्म खान पुग्ने खाद्यान्न के एल दुगड ग्रुपले उपलब्ध गराउने भएको छ।
कोरोना संक्रमित र उनीहरुका कुरुवालाई लक्षित गर्दै स्थानीय समाजसेवीले सञ्चालन गरेको सहुलियत खाना कार्यक्रमलाई के एल दुगड ग्रुपले २ महिनालाई पुग्ने चामल र दाल उपलब्ध गराउने भएको हो।
बाँके र यस आसपासको जिल्लाहरुबाट आएका संक्रमित र कुरुवा आफन्तहरुलाई खानाको समस्या भएपछि स्थानीय समाजसेवीले सहुलियत मूल्यमा खाना खुवाउने प्रबन्ध मिलाएका छन्।
प्रत्येक दिन बिहान २ सय जना र बेलुका २ सय जना संक्रमित तथा तिनका कुरुवालाई खाना खुवाउने लक्ष्यका साथ सहुलियत खाना कार्यक्रम सञ्चालनमा ल्याइएको अशोक कोइरालाले बताए।
‘बाहिर निषेधाज्ञा, कोरोनाका बिरामी कुरुवालाई खाना खुवाउन होटल ब्यवसायी डराईरहेको अवस्था र किनेरै खान्छु भन्दा पनि पानी समेत नपाएको कारुणीक अवस्था देखेपछि हामीले अभियान चलायौं’ कोईरालाले भने।
प्रतिक्रिया