बागलुङमा पहिरोले घर पुर्दा हजुरआमा-नातिसहित ३ जनाको मृत्यु

अविरल वर्षासँगै बागलुङको तमानखोला गाउँमा खसेकाे पहिरोमा पुरिएर ३ जनाको मृत्यु भएको छ भने ७ जना घाइते भएका छन्।

तमानखोला गाउँपालिका-४,लाम्लेलामा आइतबार राति राति १:३० बजे गाउँको १ सय ५० मिटर माथिबाट खसेकाे पहिरोले घर पुरिँदा एकै हजुरआमा र नातिको मृत्यु भएको हो ।

७० वर्षीया अनसरी श्रीपाली र उनका १२ वर्षीय नाति प्रविण श्रीपालीको ज्यान गएको प्रहरीले जानकारी दिएकाे छ।

पहिरोले पुरिँदा अर्को घरकी ४५ वर्षीया पञ्चकुमारी श्रीपालीको पनि मृत्यु भएको बागलुङ जिल्ला प्रहरी कार्यालयका प्रहरी नायब उपरीक्षक झविन्द्रप्रसाद भट्टराईले नेपालखबरलाई जानकारी दिए।

पहिरोले त्यहाँ ४ वटा घर पूर्णरुपमा भत्किएका छन् भने ३ घरमा आंशिक क्षति पुगेको छ। घटनास्थलमा अहिले प्रहरी पुगेको छ।

प्रहरीसहित पुगेको मेडिकल टोलीले घाइतेको उपचार गरिरहेको डिएसपी भट्टराईले जानकारी दिए।