सेती प्रादेशिक अस्पतालमा उपचाररत कोरोना संक्रमितको मृत्यु, शव व्यवस्थापनको तयारी हुँदै

कैलालीको गोदावरी नगरपालिकाका एक जना कोरोना संक्रमितको मृत्यु भएको छ।

सेती प्रादेशिक अस्पतालको भेन्टिलेटर उपचाररत गोदावरी नगरपालिका–११ का ४५ वर्षीय पुरुषको उपचारकै क्रममा बुधवार बिहान मृत्यु भएको अस्पतालका सूचना अधिकारी दिलिप कुमार श्रेष्ठले बताए।

‘धनगढीको निसर्ग अस्पतालमा भेन्टिलेटर उहाँकाे उपचार भइरहेकाे थियो, हिजो कोरोना पोजेटिभ देखिएपछि सेती अस्पताल ल्याइएको हाे’, सूचना अधिकारी श्रेष्ठले नेपालखबरसँग भने, ‘भेन्टिलेटरमा राखेर उपचार गराइरहेका थियाैँ,  तर बचाउन सकिएन।’

मृतक संक्रमित कलेजोसम्बन्धी समस्याबाट पनि पीडित रहेकाे श्रेष्ठले जानकारी  दिए।

ती पुरुषको शव व्यवस्थापनका लागि नेपाली सेनालाई खबर गरिएको उनले बताए।