विश्वभर आतंक मच्चाइरहेको कोरोना भाइरस (कोभिड १९) संक्रमणका कारण इटालीमा एकै दिन २ सय ५० जनाको मृत्यु भएको छ। यस्तै इरानमा पनि एकै दिन ८५ जनाको ज्यान गएको छ।
अन्तर्राष्ट्रिय सञ्चारमाध्यममका अनुसार योसँगै कोरोना संक्रमणबाट इटालीमा मृत्यु हुनेको संख्या १ हजार २ सय ६६ पुगेको छ।
कोरोना भाइरसको उद्गमस्थल चीनपछि सबैभन्दा बढी यसको संक्रमण हुने देश इटली नै हो। अहिलेसम्म यहाँ १७ हजार ६ सय ६० जनामा कोरोना भाइरस संक्रमण भएको छ।
यस्तै सोही संक्रमणबाट शुक्रबार एकै दिन इरानमा ८५ जनाको मृत्यु भएको छ।
इरानका स्वास्थ्य अधिकारीहरूका अनुसार योसँगै इरानमा कोरोनाका कारण मृत्यु हुनेको संख्या ५ सय १४ पुगेको छ।
यस्तै संक्रमितको संख्या ११ हजार ३६४ पुगेको इरानका सञ्चारमाध्यमले जनाएका छन्।
यस्तै पछिल्लो २४ घण्टामा कोरोनाका कारण स्पेनमा ४७, फ्रान्समा १८, अमेरिकामा ७ र दक्षिण कोरियामा ५ जनाको मृत्यु भएको छ।
कोरानाका कारण चीनमा अहिलेसम्म सबैभन्दा धेरै ३ हजार १ सय ७७ जनाको मृत्यु भएको छ। शुक्रबार भने चीनमा कोरोनाका कारण एक जनाको पनि मृत्यु भएको छैन। संक्रमण १० जनामा भेटिएको छ।
कोरोना संक्रमणबाट हालसम्म विश्वभर ५ हजार ४ सय १८ जनाको मृत्यु भएको छ। तीमध्ये शुक्रबार मात्रै ४ सय ३६ जनाको मृत्यु भएको हो।
हालसम्म विश्वभर १ लाख ४५ हजार ४ सय ४४ जनामा कोरोनाको संक्रमण पुष्टि भएको छ भने ती मध्ये १० हजार ८ सय ६७ नयाँ संक्रमित हुन्। ७१ हजार संक्रमित निको भएर घर फर्केका छन्।
गत डिसेम्बरको अन्त्यतिर चीनको वुहान क्षेत्रमा पहिलो पटक देखिएको कोरोनाको संक्रमण १ सय २९ देशमा फैलिसकेको छ।
प्रतिक्रिया