२२ कारोबार दिनमा कित्तामै २ हजार रुपैयाँसम्मले बढ्यो सेयर, कुनको कति?

धितोपत्रको दोस्रो बजार लगानीकर्ताका लागि साउनभर सुखद रह्यो। तीन वर्षपछि नेप्से सूचक पुनः ३ हजार विन्दुमा पुग्यो।

लगातार मूल्य घटेर लगानी समेत गुमाउन पुगेका लगानीकर्ताले यो एक महिनामै प्रशस्तै मुनाफा निकाल्न सफल भए। सेयरबजारमा कारोबारमा रहेका ८० प्रतिशत कम्पनीहरुको मूल्यमा २ हजारमाथिको वृद्धि देखियो। 

२२ कारोबार दिनमा ४ पटकसम्म कारोबार रकमले नयाँ रेकर्ड बनाउँदा १ सयभन्दा बढी कम्पनीहरुको सेयरमूल्यमा सकारात्मक सर्किट लागेको थियो। 

सर्किट लाग्ने कम्पनी मात्र नभई मूल्यगत आधारमा २२ दिनमा कित्तामै १ सयभन्दा बढी रुपैयाँको वृद्धि देखिएका १६४ वटा कम्पनीको विश्लेषण गर्दा अधिकतम २ हजार रुपैयाँसम्मको वृद्धि भएको छ। 

नेपाल स्टक एक्सचेन्ज (नेप्से)का अनुसार सूचीकृत १९ वाणिज्य बैंकहरुमा ९ बैंकको कित्तामै १ सयदेखि १५३ रुपैयाँसम्म मूल्य बढेको छ।

यता विकास बैंकहरुको पनि २७६ रुपैयाँसम्मको वृद्धि देखिएको छ। यो अवधिमा १४ फाइनान्स, ५ होटल, ५६ जलविद्युत् कम्पनी, ६ लगानी समूहका कम्पनी, १२ जीवन बिमा कम्पनी र ८ उत्पादन तथा प्रशोधन समूहका कम्पनीहरुका लगानीकर्ताले उच्च नाफा निकालेका छन्। 

तुलनात्मक आधारमा यो महिना अन्य कम्पनीभन्दा लघुवित्तका लगानीकर्ताका लागि विशेष हुनपुगेको छ। 

२३ लघुवित्तको कित्तामै ८ सय रुपैयाँभन्दा धेरैले मूल्य बढेको छ। यस्तै निर्जीवन बिमातर्फ १२ कम्पनीको मूल्य १ सयभन्दा धेरैले बढ्दा व्यापार समूहका तीनवटा र अन्य समूहका ४ कम्पनीको सेयरमा अधिकतम २ हजारसम्मको वृद्धि देखिएको छ। 

एक महिनामा सबैभन्दा धेरै सेयर बढेका कम्पनी
फाइनान्स 
यो महिना फाइनान्स समूहका लगानीकर्ताका लागि कुल कारोबारमा आएका २० फाइनान्स कम्पनीमध्ये १४ कम्पनीका लगानीकर्ताले मुनाफा निकाल्न सफल भएका छन्। 

यी कम्पनीहरुको कित्तामै अधिकतम ५२३ रुपैयाँले सेयरमूल्य बढेको हो। जेठ महिनादेखि नै फाइनान्स समूहका कम्पनीहरुको मूल्य बढ्न थालिसकेको थियो। साउन महिनामा झनै बढ्नपुगेको छ।  

यो अवधिमा सबैभन्दा धेरै नेपाल फाइनान्सको मूल्य बढेको छ। २२ दिनमा यो कम्पनीको सेयरमूल्य कित्तामै ११ सय ७६ रुपैयाँले बढेको हो।

लघुवित्त 
कारोबारमा आएका यो समूहका ५० कम्पनीमध्ये यो महिना २३ वटाको मूल्यमा उच्च वृद्धि देखिँदा २७ वटा कम्पनीको मूल्य घटेको छ। 

जेठ महिनाबाटै क्रमशः बढ्न थालेका लघुवित्तका कम्पनीका लगानीकर्ताहरुले साउन महिनामा नाफा बुक गर्ने बढ्दा पनि कारोबारमा आएका ५० वटै कम्पनीको सेयरमूल्य बढ्न सकेन। 

२३ वटा कम्पनीको मूल्यमा उच्चवृद्धि देखिँदा २७ वटा कम्पनीको मूल्य भने घटेको छ। यो अवधिमा सबैभन्दा धेरै उपकार लघुवित्तका लगानीकर्ताले कमाएका छन्। यो कम्पनीको २२ दिनमा कित्तामै ८ सय ४४ रुपैयाँले मूल्य बढेको हो। 

जलविद्युत्
जलविद्युततर्फ साउन महिनाभर ९० वटा कम्पनीको सेयर कारोबार भएको छ। जसमा ५६ वटा कम्पनीको कित्तामा १ सयभन्दा माथिको वृद्धि देखिँदा सिक्लेस हाइड्रो, तेह्रथुम हाइड्रो र मान्डु हाइड्रोको मूल्यमा अधिकतम २८३ रुपैयाँसम्मको गिरावट देखियो। 

२२ कारोबार दिनमा कुथेली बुखारी हाइड्रोको कित्तामै ६६७ रुपैयाँको वृद्धिसहित सर्वाधिक नाफा कमाउनेमा पहिलो बनेको हो।

योबाहेक अन्य ५६ वटा कम्पनीमा कित्तामा सयभन्दा माथिको वृद्धि देखिएको हो। 

वाणिज्य बैंक 
नेप्सेमा सूचीकृत भएका १९ वाणिज्य बैंकमध्ये साउनमा ९ वटा बैंकहरुको मात्रै कित्तामा सय रुपैयाँमाथिको वृद्धि देखिएको छ। 

नेपाल राष्ट्र बैंकले बैंकको नाफा खुम्चिएर लाभांश दिन नसक्ने अवस्थामा पुगेको कारण देखाउँदै बैंकलाई फाइदा पुर्‍याउने गरी नीतिगत व्यवस्था गरेपछि त्यसले धितोपत्रको दोस्रोबजारमा सकारात्मक प्रभाव पारेको थियो। 

यसले गर्दा लामो समयसम्म बढ्न नसकेका वाणिज्य बैंकहरुको मूल्य पछिल्लो २२ दिनमै कित्तामै अधिकतम १५३ रुपैयाँसम्मले बढेको हो। 

यो अवधिमा सबैभन्दा धेरै एभरेष्ट बैंकको मूल्य बढेको छ। एक कित्तामै १५३ रुपैयाँले बढ्दा सर्वाधिक नाफा निकाल्नेमा एभरेष्ट बैंकका लगानीकर्ता पहिलो नम्बरमा देखिएका हुन्। 

विकास बैंक 
क्षमताको हिसाबले वाणिज्य बैंकहरु अगाडि आएपछि धितोपत्र बजारमा विकास बैंकको आर्कषण धेरै छ। पछिल्लो एक महिनामा देखिएको मूल्यगत वृद्धिले वाणिज्य बैंकहरुलाई विकास बैंकले पछि पारेका हुन्। 

विकास बैंकको एक कित्ता सेयरमै अधिकतम २७६ रुपैयाँले वृद्धि देखिएको छ। कर्णाली विकास बैंकको मूल्य यो एक महिनामा एक कित्तामा २७६ रुपैयाँले बढेर ७६० रुपैयाँमा पुगेको हो। 

होटल तथा पर्यटन 
होटल तथा पर्यटन समूहका सात कम्पनीमध्ये ५ वटाको यो महिना कित्तामा अधिकतम ४९३ रुपैयाँले सेयरमूल्य बढ्न पुग्यो। 

कारोबारमा आएकामध्ये तारागाउँ रिजेन्सी होटलको मूल्य यो अवधिमा कित्तामा ४९३ रुपैयाँले बढेर १ हजार ३ सय रुपैयाँमा पुगेको छ।

साउन १ गते ८०७ रुपैयाँमा कारोबार भएकोमा महिनाको अन्तिम दिन १ हजार ३ सय रुपैयाँमा कारोबार भएको हो।

जीवन बिमा 
जीवन बिमातर्फ भने साउन महिनाभर कारोबारमा आएका १२ वटै कम्पनीको मूल्यमा उच्च वृद्धि देखिएको छ। 

नेप्सेका अनुसार कारोबारमा आएका १२ मध्ये सबैभन्दा धेरै लाइफ इन्स्योरेन्स कर्पोरेसनको मूल्य बढेको हो। यो कम्पनीको २२ कारोबार दिनमा कित्तामा ६२७ रुपैयाँले बढेर २०६५ रुपैयाँँमा सेयर किनबेच भएको हो। 

जीवन बिमा सूमहतर्फ साउन महिनाभर लाइफ इन्स्योेरेन्स कर्पोरेसनका लगानीकर्ताले नै सबैभन्दा धेरै नाफा निकाल्न सफल भए।

यीबाहेकका कम्पनीहरुले पनि यो महिना कित्तामै १ सय रुपैयाँमाथिको नाफा निकाल्न सफल बनेका छन्। 

निर्जीवन बिमा 
जीवन बिमाजस्तै यो महिनाभर सबै निर्जीवन बिमा कम्पनीहरुको मूल्यमा उच्चतम वृद्धि देखिएको छ। कारोबारमा आएका १२ वटै कम्पनीहरुले कित्तामै अधिकतम ५ हजारमाथिको नाफा निकाल्न सकेका हुन्। 

राष्ट्रिय बिमा कम्पनीको यो अवधिमा कित्तामा ५ हजार १ सय बढेर १८ हजार ५९० रुपैयाँ पुगेको हो। 

योबाहेक कम्पनीहरुको पनि कित्तामा ३ सय रुपैयाभन्दा बढीले सेयरमूल्य बढेको देखिन्छ। 

उत्पादन तथा प्रशोधन 
उत्पादन तथा प्रशोधन समूहतर्फ भने सर्वाधिक महंगो मानिएको सेयर (युनिलिभरको) वृद्धिलाई बोटलर्स नेपाल तराईले जितेको हो। 

साउनभर भएको २२ कारोबार दिनमा युनिलिभरको कित्तामा २६ सय ७३ रुपैयाँको वृद्धि देखिँदा बोटलर्स नेपाल (तराई)को कित्तामै ३ हजार ४३ रुपैयाँले बढेको हो। 

युनिलिभरको प्रतिकित्ता ५० हजार रुपैयाँ र बोटलर्स नेपाल (तराई) को प्रतिकित्ता १६ हजार ४३ रुपैयाँ सेयरमूल्य रहेको छ। 

अन्य समूह
अन्य समूहतर्फ भने कारोबारमा आएका ७ वटा कम्पनीमध्ये ४ वटा कम्पनीको मूल्यमा सयभन्दा माथिको वृद्धि देखिएको छ। 

जसमा हिमालयन रिको कित्तामै ४०५ रुपैयाँले बढ्दा मुक्तिनाथ कृषि कम्पनी, नेपाल दूरसञ्चार कम्पनी र नेपाल रिइन्स्योरेन्स कम्पनीको मूल्यमा २ सयमाथिको वृद्धि देखिएको हो। 

व्यापार 
यो अवधिमा व्यापार समूहका तीन कम्पनीको मूल्यमा उच्च वृद्धि देखिएको छ। 

२२ कारोबार दिनमा नेपाल साल्ट ट्रेडिङको कित्तामै १९९४ रुपैयाँले बढेर मूल्य ६ हजार ८ सय ९९ रुपैयाँ पुगेको छ। 

योबाहेक यो अवधिमा विशाल बजार कम्पनीको कित्तामा ८ सय १३ रुपैयाँ र नेपाल वेयरहाउजिङ कम्पनीको कित्तामा २३१ रुपैयाँले मूल्य बढेको हो।

लगानी समूह
लगानी समूहतर्फ भने ६ वटा कम्पनीको मूल्य अधिकतम ५८० रुपैयाँले बढेको छ। सबैभन्दा धेरै हाथवे इन्भेष्टमेन्ट कम्पनीको मूल्य बढेको हो। 

५० रुपैयाँ मूल्यमै प्राथामिक सेयर निष्काशन गरेको यो कम्पनीको मूल्य पछिल्लो २२ कारोबार दिनमा कित्तामा ५८० रुपैयाँले बढेर १५ सय ९३ रुपैयाँमा पुगेको हो। 

योबाहेक अन्य कम्पनीहरुको मूल्यमा उच्च वृद्धि देखिएका छन्।