नारायणी नदीमा व्यावसायिक रूपमा ‘क्रुजसिप’ सञ्चालनमा आएको छ। राइनो वाटर इन्टरटेन्मेन्ट प्रालिले निर्माण गरेको क्रुजसिप व्यावसायिक रूपमा सञ्चालनमा ल्याइएको हो। यही माघ १ गतेदेखि क्रुजसिप नियमित रूपमा व्यावसायिक सञ्चालन गरिएको हो।
राइनो वाटर इन्टरटेन्मेन्ट प्रालिका कार्यकारी निर्देशक दीपक ढुङ्गेलले तीन दिनदेखि क्रुजसिप नियमित रूपमा सञ्चालन भइरहेको बताए। दैनिक तीनपटक सञ्चालन गर्ने गरिएको छ। दैनिक एक सय जनाभन्दा बढीले क्रुजमा मनोरञ्जन लिएको उनले जानकारी दिए।
काठमाडौँ, पोखरालगायतका जिल्लाबाट समेत क्रुज सयरका लागि आएको उनको भनाइ छ। उनले भने, “सुरुआती चरणमा उत्साहजनक उपस्थिति छ।” स्थानीयसहित बाहिरी जिल्लाबाट समेत पर्यटक आएको उन बताउँछन्। क्रमशः ५०–६० जना भएसँगै क्रुज सञ्चालन गर्ने गरी तयारी गरिएको छ।
केही वर्षअघि नै सञ्चालनमा ल्याउन खोजे पनि कोरोना महामारी र कानुनी समस्याका कारण क्रुज सञ्चालन गर्न नसकिएको उनले बताए। क्रुजको दुई वर्षअगाडि नै सफल परीक्षण गरिएको थियो। एक घण्टासम्म नारायणी नदीमा सयर गराउने योजना रहेको उनले बताए। यसका लागि रु सात सयको टिकट काट्ने गरिएको छ। यसमा एक कप कफी दिने गरिएको छ।
यसका अलावा विभिन्न प्याकेज पनि तयार पारेको उनले बताए। ब्रेकफास्ट क्रुजिङका लागि रु एक हजार पाँच सय, लञ्च क्रुजिङका लागि रु दुई हजार, डिनर क्रुजिङका लागि रु दुई हजार पाँच सय शुल्क तोकिएको छ। केही दिनभित्रै सुरुमा डिनरबाट प्याकेज सञ्चालन गर्ने तयारी गरिएको छ। यो समयमा बिहानमा कुहिरोका कारण सञ्चालन कठिन हुने भएकाले लञ्च र डिनर गर्न सकिने उनको भनाइ छ।
क्रुजसिपभित्र रेस्टुरेन्ट, सांस्कृतिक कार्यक्रम गर्न आकर्षक स्टेज, बैठक सेमिनार गर्न मिल्ने हल, सेल्फी प्वाइन्टहरू राखिएका छन्। भरतपुर महानगरपालिका–१६ ज्ञानेश्वर सामुदायिक वनस्थित काभ्रेघाटमा क्रुजसिपको स्टेसन छ। तीन तलाको क्रुजमा दुई सय जना यात्रु एकैसाथ चढ्न मिल्छ।
कम्पनीका प्रबन्ध निर्देशक रामचन्द्र कँडेलका अनुसार यो क्रुजसिप निर्माणमा रु १५ करोडभन्दा बढी खर्च भएको छ। क्रुजमा सेल्फी लिने तथा चलचित्र सुटिङ गर्न मिल्ने युनिट डिजाइन परिवर्तन गरी थपिएको छ। क्रुजमा यात्रा गर्ने हरेक यात्रुको रु १० लाख बराबरको बिमा गरिएको छ। क्रुजसिपमै बसेर विवाह, व्रतबन्ध, पास्नी, जन्मोत्सव, वैवाहिक वर्षगाँठलगायतका गतिविधि गर्न पाइने उनले जानकारी दिए।
नारायणी नदीको ४० किलोमिटरमा सञ्चालनका अनुमति लिएको निर्देशक कँडेलको भनाइ छ। यतिबेला पानीको सतह निकै कम भएकाले केही किलोमिटर मात्र चलाइने छ। पानीको बहावअनुसार दूरी बढाउँदै लैजाने उनले बताए। नर्वेजियन प्रविधिको प्रयोग गरेर बनाइरहेको क्रुजसिप भारतको केरलाका प्राविधिकले तयार गरेका हुन्। यसको चालक दलमा १५ जना रहने छन्।
क्रुजसिप सञ्चालनसँगै यहाँको पर्यटन क्षेत्रमा सकारात्मक प्रभाव पार्ने अपेक्षा व्यवसायीले गरेका छन् । चितवन राष्ट्रिय निकुञ्ज घुम्न आउने पर्यटकलाई एक दिनको बसाइ लम्ब्याउन र मनोरञ्जन दिन क्रुज उपयोगी हुनसक्ने व्यवसायीको भनाइ छ। रासस
Shares
प्रतिक्रिया