युनिकोड
राष्ट्रपति विद्यादेवी भण्डारीले दशरथ रंगशालामा भव्य कार्यक्रमकाबीच सागको उद्घाटन गरेकी हुन्।
आइतबार साँझ उद्घाटन कार्यक्रममा राष्ट्रपति भण्डारी, खेलकुद मन्त्री जगत बहादुर विश्वकर्मा, राखेपका सदस्य सचिव रमेश सिलवालसहित विभिन्न राजनीतिक पार्टीका नेता, खेलाडी तथा पत्रकारहरुको सहभागिता थियो।
उद्घाटन समारोहको पहिलो घण्टामा अन्तर्राष्ट्रिय परम्परा अनुसार देशभर घुमाएर ल्याइएको ओलम्पिक टर्चबाट दीप प्रज्वलन, झण्डोत्तोलन, सपथ ग्रहण, स्वागत मन्तव्य तथा राष्ट्रपतिद्वारा उद्घाटन तथा सम्बोधनको कार्यक्रम सम्पन्न भएको थियो।
त्यस्तै मार्चपासमा खेलाडी, अफिसियल, पदाधिकारी, प्रतिनिधिहरु सहभागी थिए। मार्चपासमा नेपालको झण्डा ओलम्पियन तथा भारोत्तोलन खेलाडी कमलबहादुर अधिकारीले बोकेका थिए।
यसपटक दीप प्रज्वलन सागमा लगातार चारपटक स्वर्ण जितेका कीर्तिमानी तेक्वान्दोका खेलाडी दीपक विष्टले गरेका थिए।
राष्ट्रिय क्रिकेट टोलीका सदस्य तथा पूर्व कप्तान पारस खड्काले खेलाडीका तर्फबाट सपथ लिएका थिए।
त्यस्तै ब्याडमिन्टनका अम्पायर दीपक थापाले निर्णायकका तर्फबाट सपथ लिएका थिए।
त्यसपछिको बाँकी समयमा कला संस्कृतिको प्रदर्शनी भएको थियो।
उद्घाटन कार्यक्रममा लेजर बिम, लाइटिङ तथा ड्रोनबाट समेत विशेष प्रस्तुती भएको थियो। त्यसबाहेक ५ सय जनाले नेपाली मौलिक बाजाहरु घन्काएका थिए।
यस्तै मुकुन्द शर्माको रचना, प्रकाश गुरुङको संगीतमा आनन्द कार्की, कुन्ती मोक्तान, इन्दिरा जोशी र सत्यराज आचार्यलगायतको गायन टोलीले सार्क गीत गाए।
नेपाली सेना, नेपाल प्रहरी, सशस्त्र प्रहरी बल, विद्यार्थी र विभिन्न जातजातिका गरी झण्डै १५ हजार जनाको प्रस्तुति उद्घाटन र समापन समारोहमा रहेको थियो।
उद्घाटनमा सशस्त्र प्रहरीका साढे चार हजार, सेनाका साढे एक हजार, प्रहरीका एक हजार, विद्यार्थी तीन हजार, झाँकी समूहका चार हजार, व्यावसायिक कलाकार तीन सय जनशक्ति प्रयोग भएका थिए।
अन्तिममा आतिसबाजीसहित उद्घाटन समारोहको समापन भयो।
३ सय १७ स्वर्णका लागि प्रतिस्पर्धा
काठमाडौ, पोखरा र जनकपुरमा हुने १३ औं सागमा ३ सय १७ स्वर्ण, त्यतिनै रजत र ४ सय ८१ कास्य पदकका लागि स्पर्धा हुँदैछ।
केही खेलहरु भने उद्घाटन अगाडि नै सुरुवात भइसकेका छन्।
यसअघि १९९९ मा भएको आठौं सागमा नेपालले ३१ पदक हात पारेको थियो। उक्त कीर्तिमानलाई तोड्दै नेपालले यसपटक कम्तीमा ५० वटा स्वर्ण पदक ल्याउने लक्ष्य राखेको राष्ट्रिय खेलकदु परिषद् ९राखेप०का सदस्यसचिव रमेशकुमाल सिलवालले बताए। राखेपले २१ खेलका खेलाडी वैदेशिक प्रशिक्षणमा पठाउनुका साथै बाँकी खेलका विदेशी प्रशिक्षकलाई स्वदेशमा झिकाएर प्रशिक्षण गराएको थियो।
सागमा स्विमिङमा सर्वाधिक ३८ स्वर्ण पदकका लागि प्रतिस्पर्धा हुनेछ। यसैगरी एथ्लेटिक्समा ३६ स्वर्ण पदकका लागि प्रतिस्पर्धा हुँदा उसुमा २२ स्वर्णका लागि प्रतिस्पर्धा हुनेछ। तेक्वान्दोमा २९, भारतोलन, कुस्ती र सुटिङमा २०–२० स्वर्ण पदकका लागि प्रतिस्पर्धा हुनेछ। करातेमा १९ तथा बक्सिङमा १६ स्वर्ण पदकका लागि भिडन्त हुनेछ। यसैगरी जुडोमा १५ ,फेन्सिङमा १२ र आर्चरीमा १० स्वर्ण पदकका लागि खेलाडीले प्रतिस्पर्धा गर्नेछन्।
यस्तै साइक्लिङमा ८, ब्याडमिन्टन, टेबल टेनिस र टेनिसमा ७–७, ट्रायथलनमा ५ वटा स्वर्ण, स्क्वास र गल्फमा ४, बास्केटबल, थ्री बाई थ्री बास्केटबल, क्रिकेट, फुटबल, ह्यान्डबल, कबड्डी, खो खो, भलिबल र बिच भलिबलमा २–२ वटा स्वर्ण पदकका लागि प्रतिस्पर्धा हुनेछ।
राखेपका अनुसार खेल अवधिभर सात देशका २ हजार ९ सय १० खेलाडी र ७ सय ६९ अफिसियल सहाभागी हुनेछन्। सागमा नेपालबाट सर्वाधिक ५ सय ९४ खेलाडीले सहभागिता जनाउँदै छन्। त्यस्तै व्यवस्थापक तथा प्रशिक्षक गरि एक सय ८६ ले पनि सहभागिता जनाउने छन्। भारतबाट ५ सय ३५ खेलाडी र १ सय ६७ अफिसयलले सहभागिता जनाउँदै छन्।
बंगलादेशबाट ४ सय ७८ खेलाडी र १ सय ४७ अफिसियल, पाकिस्तानबाट ३ सय ७८ खेलाडी र १ सय ५ अफिसियल, श्रीलंकाबाट ५ सय ५६ खेलाडी र १ सय ८३ अफिसियल, माल्दिभ्सबाट २ सय ५२ खेलाडी र ६८ अफिसियल गरि जम्मा ३७ सय ९ जना खेलाडी, प्रशिक्षक र व्यवस्थापकले सहभागिता जनाउँदैछन्।
प्रतिक्रिया