युनिकोड
काठमाडौंबाट हङकङ पठाएको सामानमा लागुऔषध भेटिएको घटनाबारे आधिकारिक जानकारी माग गर्दै नेपाल प्रहरीले पत्र पठाएको छ। हङकङको अध्यागमन विभागलाई पत्र पठाउँदै नेपाल प्रहरीको लागुऔषध नियन्त्रण ब्यूरोले विवरण माग गरेको हो।
‘हामीलाई नेपालकै कार्गो कम्पनीले दिएको जानकारीका आधारमा अनुसन्धान गरिरहेका छौं। त्यहाँबाट आधिकारीक जानकारी आएको होइन। अहिले हामीले कुन लागुऔषध के कति परिणाममा पुगेको भनेर आधिकारीक जानकारी मागेका हौं’, लागुऔषध नियन्त्रण ब्यूरोका प्रमुख एसएसपी गोबिन्द थपलियाले जानकारी दिए।
नेपालबाट कार्गो कम्पनीमार्फत बुक कभर भनेर पठाएको सामानमा हङकङ विमानस्थलमा भन्सारले चेकजाँच गर्दा लागुऔषध गाँजा फेला परेको थियो। सोही विषयमा अनुसन्धान गरिरहेको ब्यूरोले त्यहाँको भन्सारसँग विवरण माग गरेको हो।
त्रिभुवन अन्तर्राष्ट्रिय विमानस्थलमा प्रहरीले चेकजाँच गर्ने भएपनि लागुऔषध छिरेपछि प्रहरीमाथि पनि अनुसन्धान भइरहेको छ। विमानस्थल सुरक्षा प्रहरी कार्यालय र लागुऔषध नियन्त्रण ब्यूरोले छुट्टा छुट्टै छानबिन समिति बनाएर यो घटनाबारे छानबिन गरिरहेका छन्।
विमानस्थल सुरक्षा प्रहरीले एसपी पदम बिष्टको संयोजकत्वमा र लागुऔषध नियन्त्रण ब्यूरोले डीएसपी अनन्तराम शर्माको नेतृत्वमा समिति बनाएर छानबिन गरिरहेको छ। ब्यूरोबाट विमानस्थलमा डीयूटीमा खटिएका प्रहरीहरुलाई जिम्मेवारीबाट तानेर अनुसन्धान भइरहेको छ।
त्यसदिन कार्गोको डीयूटीमा लागुऔषध नियन्त्रण ब्यूरोका वरिष्ठ सई निरन्जन पनेरु, असई कैलास राउत र विष्णुबहादुर थापा तथा हवल्दार प्रदीप बस्नेत थिए।
काठमाडौंबाट कार्गो कम्पनीमार्फत बुक कभर भनेर पठाएको सामानभित्र हङकङको विमानस्थलमा चेकजाँच गर्दा गाँजा फेला परेको थियो। हङकङको एसएफ कुरिएर कम्पनीले गाँजा फेला परेको भन्दै नेपालबाट सामान पठाउने कुरियर कम्पनीलाई जानकारी गराएको थियो।
नेपालको कार्गो कम्पनीले त्यसको जानकारी प्रहरीलाई गराएको हो। साउन २६ गते नेपाल एयरलाइन्समार्फत उक्त गाँजा पुगेको हो।
यस बारेमा प्रहरीलाई साउन ३१ गते जानकारी गराइएको थियो।
विराट कार्गो कम्पनीले हङकङको एसएफ एक्सप्रेस कार्गो कम्पनीलाई सामान पठाएको थियो। तर हङकङ विमानस्थलमा चेकजाँचका क्रममा पक्राउ गरेपछि बुक कभरभित्र लागुऔषध रहेको खुलेको हो।
प्रहरीले हङकङबाट तस्करले भित्र्याएको ६० किलो सुनको विषयमा अनुसन्धान गरिरहँदा यहाँबाट पनि लागु औषध पुगेको घटना बाहिरिएको हो।
हङकङमा लागुऔषध पुगेको घटनामा विमानस्थल प्रहरीले पनि थाल्यो अनुसन्धान
प्रतिक्रिया