युनिकोड
नेपाल राष्ट्र बैंकले आर्थिक वर्ष २०८०/८१ लाई आधार वर्ष मानेर नयाँ उपभोक्ता मुल्य सूचकाङ्क सार्वजनिक गर्ने भएको छ।
बुधबार थापाथलीस्थित राष्ट्र बैंकको भवनमा कार्यक्रम गर्दै बैंकले ७ वटा प्रदेश, ७७ वटा जिल्लालाई समेटेर नयाँ मूल्य सूचकांक सार्वजनिक गर्न लागेको हो।
बैंकले अन्तर्राष्ट्रिय मुद्रा कोषको मापदण्डमा रहेर ९ वर्षपछि आधार वर्षलाई परिवर्तन गरेको छ। आर्थिक विभागका उपनिर्देशक सुमन न्यौपानेले सहर र गाउँ गरेर मूल्य संकलन गरी नयाँ दर सार्वजनिक गरिएको बताए।
‘हामीले ९ वर्षपछि आव २०८०/८१ को वर्षलाई आधार वर्ष मानेर ८७ वटा बजारबाट ५२५ वटा वस्तुको मूल्य संकलन गरेर त्यसको औसत मूल्यअनुसार उपभोक्ता मूल्य सूचकांक तयार पारेका हौँ’, उनले भने।
राष्ट्रिय तथ्यांक कार्यालय र त्रिभुवन विश्वविद्यालयसँगको सहकार्यमा राष्ट्र बैंकले ७७ वटा जिल्लाका ८७ वटा बजारलाई संकलन केन्द्र मानेको छ। जसमा २१ वटा ग्रामीण क्षेत्रबाट मूल्य संकलन गरिएको छ भने ६६ वटा सहरी क्षेत्रबाट मूल्य संकलन गरिएको छ।
राष्ट्र बैंकले शोधनान्तर स्थितिको तथ्यांकलाई पनि स्पष्ट पार्न अन्तर्राष्ट्रिय मापदण्ड बीपीएम सिक्सअनुसार तथ्यांक सार्वजनिक गर्ने भएको छ।
प्रतिक्रिया