युनिकोड
नेपाल राष्ट्र बैंकका गभर्नर डा. चिरञ्जीवि नेपालले नीतिगत सुधारसँगै मुलुकको अर्थतन्त्र सकारात्मक भएको बताएका छन् ।
नेपाल आर्थिक पत्रकार समाज (सेजन)को २२ औं स्थापना दिवसका अवसरमा आइतबार काठमाडौंमा आयोजित एक कार्यक्रमलाई सम्बोधन गर्दै गभर्नर नेपालले नीतिगत सुधार भएपछि पछिल्लो तीन वर्ष आर्थिक सूचकहरु सकारात्मक रहेको बताए। उनले नीतिगत सुधारसँगै ब्याजदरमा सुहलियत दिंदा समेत उद्योगी व्यवसायीहरुले लगानी बढाउन नसकेको भन्दै प्रश्न समेत गरे।
सरकारले उद्योगीहरुलाई कम ब्याजदरमा पुर्नकर्जा र रोजगारी बढाउन सहुलियत ऋण दिएपनि उत्पादन बढन नसकेको बताए। जसका कारण आर्थिक सूचकहरु सकारात्मक रहेपनि व्यापारघाटा उच्च रहेको उनले बताए।
गभर्नर नेपलले राष्ट्र बैंकले सुविधाभोगी क्षेत्रमा ब्याजदर नघटाउने तर निर्यातजन्य उत्पादनमूलक उद्योगका लागि ब्याज सहुलियत दिने नीति लागू गरेको समेत बताए।
यता, उद्योगी व्यवसायीहरुले भने मुलुकमा अझैपनि लगानीको वातावरण बन्न नसकेको बताएका छन्। उद्योगीहरुले नीतिगत रुपमा लगानीको वातावरण बनेको भएपनि व्यवहारमा बन्न नसकेको गुनासो गरेका हुन्।
नेपाल उद्योग वाणिज्य महासंघका वरिष्ठ उपाध्यक्ष शेखर गोल्छाले मुलुकको आर्थिक सूचकहरु सकारात्मक भएपनि व्यापार घाटा उच्च हुनु र लगानीको वातावरण बन्न नसक्नुले निजी क्षेत्र प्रोत्साहित हुन नसकेको बताए। उनले सम्पत्ती अभिलेखिकरण नभई सुद्धिकरण हुनुले लगानी बढ्न नसकेको बताए। बैंकको ब्याजदर उच्च भएका कारण अन्तर्राष्ट्रिय बजारमा प्रतिस्पर्धा गर्न नसकिएको समेत उनले बताए।
नेपाल उद्योग परिसंघका अध्यक्ष सतिस मोरले औद्योगिक क्षेत्रमा आउने वैदेशिक लगानीमा पनि डलरको भाउ घटबढ हुँदा हुने जोखिम कम गर्न हेजिङ सुविधा दिनुपर्ने बताए । उनले हेजिङ ऐन लागू भएपनि त्यसले सबै क्षेत्र समेटन नसकेको र वैदेशिक लगानी प्रभावित भएको बताए।
कार्यक्रममा नेपाल घरेलु तथा साना उद्योग महासंघका अध्यक्ष श्याम गिरीले तत्काल औद्योगिक उत्पादन बढ्न नसक्ने भएकाले साना उद्योगीहरुले उत्पादन गरेका वस्तुहरुलाई निर्यात गर्न सरकारले ध्यान दिनुपर्ने बताए। उनले गाउँगाउँमा उत्पादन हुने वस्तुहरुको बजारीकरणका लागि सरकारले चासो नदिएको गुनासो समेत गरे।
उद्योगीहरुले मुलुकमा वैदेशिक लगानी भित्र्याउन विभिन्न पहलहरु भएपनि लगानी बढ्न नसकेको बताएका छन्। त्यस्तै उद्योगीहरुले खुला बजार अर्थतन्त्रमा नियामक निकाय राष्ट्र बैंकले ब्याजदरमा नियमन गर्न नसक्दा औद्योगिक क्षेत्र प्रभावित भएको बताएका छन्।
कार्यक्रममा आर्थिक पत्रकार समाज (सेजनले) छापा र विद्युतिय माध्यममा उत्कृष्ट रिपोर्टिङ गर्ने दुईजना आर्थिक पत्रकारहरु मातृका दाहाल र केदार दाहाललाई जनही ५० हजार रुपैयाँका दरले पुरस्कृत गरेको थियो। त्यस्तै सेजनले लामो समयदेखि आर्थिक पत्रकारिता गरिरहेका नितु पण्डित, शिव दुवाडी, जुनारबाबु बस्नेत र रामप्रसाद दाहाललाई सम्मान गरेको छ।
प्रतिक्रिया