युनिकोड
जारी आईसीसी टी-२० विश्वकप २०२४ को सेमिफाइनल समीकरण पूरा भएको छ।
सुपर ८ अन्तर्गत मंगलबार बिहान भएको अन्तिम खेलमा बंगलादेशलाई डीएलएस मेथडमा ८ रनले हराउँदै अफगानिस्तानले अन्तिम चारमा स्थान बनाएसँगै नवौँ संस्करणको विश्वकपको सेमिफाइनल समीकरण पूरा भएको हो।
योसँगै विश्वकपको पहिलो सेमिफाइनलमा दक्षिण अफ्रिका र अफगानिस्तान खेल्नेछन्। सो खेल बिहीबार बिहान सवा ५ बजे सुरु हुनेछ।
दोस्रो सेमिफाइनलमा भारत र इङ्ल्यान्ड भिड्नेछन्। सो खेल बिहीबार राति सवा ८ बजे सुरु हुनेछ।
खराब मौसमका कारण तोकिएको समयमा सेमिफाइनल खेल सुरु हुन नसके १० ओभरमा घटाइनेछ।
खेलै हुन सकेन भनेचाहिँ सुपर ८ मा आफ्नो समूहमा शीर्ष स्थानमा रहने टोली फाइनलमा पुग्ने प्रावधान आईसीसीले राखेको छ।
सेमिफाइनल खेल सुपर ओभरमा पुगे र मौसमले खेल पूरा हुन नसके पनि सोही नियम लागु हुनेछ।
विश्वकपको फाइनलमा खेल पनि वर्षाका कारण हुन नसके वा सुपर ओभरमा पुगेर पनि खेल पूरा हुन नसकेको अवस्थामा दुवै टोलीलाई संयुक्त रूपमा विजेता घोषणा गरिने आईसीसीले जनाएको छ।
पहिलो सेमिफाइनलमा दक्षिण अफ्रिका र अफगानिस्तान भिड्नेछन्।
सुपर ८ मा अस्ट्रेलियालाई हराउँदै अफगानिस्तानले सनसनी मच्चाएको थियो।
दोस्रो सेमिफाइनलमा पूर्वविश्व विजेता क्लबीचको भिडन्त रोमाञ्चक हुने आशा गरिएको छ।
इङ्ग्ल्यान्डले सन् २०१० र २०२२ को उपाधि जितेको छ। इङ्ल्यान्ड तेस्रोपटक विजयी बनेर तीनपटक विश्वकप उपाधि जित्ने एक्लो टोली बन्न चाहन्छ।
भारतले भने सन् २००७ मा एकपटक मात्र उपाधि उचाल्ने मौका पाएको छ। त्यसैले भारत दोस्रोपटक विश्व च्याम्पियन बन्ने दाउमा छ।
फाइनल खेल शनिबार राति सवा ८ बजे सुरु हुनेछ।
विश्वकपको सेमिफाइनलसम्म आइपुग्दा भारत र दक्षिण अफ्रिका मात्र अपराजित छन्।
सुपर ८ को समूह १ बाट भारत समूह विजेता र अफगानिस्तान समूह उपविजेताका रूपमा सेमिफाइनलमा पुगेका हु्न्।
अस्ट्रेलिया र बंगलादेश भने बाहिरिए। सुपर ८ मा अस्ट्रेलियाले १ खेलमा जित र २ खेलमा हार भोग्यो। बंगलादेश भने सुपर ८ मा कुनै जित हात पार्न सकेन।
समूह २ बाट दक्षिण अफ्रिका र इङ्ग्ल्यान्डले सेमिफाइनलमा स्थान बनाउँदा आयोजक वेस्ट इन्डिज र अमेरिका भने बाहिरिए।
समूह २ को दक्षिण अफ्रिका समूह डी को विजेताका रूपमा सुपर ८ मा पुगेको थियो। समूह चरणमा अपराजित रहेको दक्षिण अफ्रिकाले ४ खेलमा ८ अंक बनाउँदै सुपर ८ मा पुगेको थियो।
सुपर ८ मा पनि अपराजित दक्षिण अफ्रिकाले तीन खेलमा ६ अंक बनाउँदै समूह २ को विजेताका रूपमा सेमिफाइनल खेल्न लागेको हो।
पहिलोपटक विश्वकपको उपाधि जित्ने यात्रामा दक्षिण अफ्रिका बलियो देखिएको छ।
इङ्ग्ल्यान्ड भने समूह बीको उपविजेताका रूपमा सुपर ८ मा पुगेको थियो। २ खेलमा जित, १ खेलमा हार र १ खेलमा अंक बाँड्दै ५ अंकमा इङ्ग्ल्यान्ड सुपर ८ मा पुगेको थियो।
सुपर ८ मा इङ्ग्ल्यान्डले २ खेलमा जित र १ खेलमा हार भोग्दै ४ अंकमा समूह २ को उपविजेताका रूपमै सेमिफाइनल खेल्न लागेको हो।
दक्षिण अफ्रिकासँग आयोजक वेस्ट इन्डिज पराजित भएपछि इङ्ल्यान्ड सेमिफाइनलमा पुग्न सफल भएको हो।
समूह १ बाट भारत अपराजित रहँदै सेमिफाइनल खेल्न लागेको हो।
३ खेलमा जित र १ खेलमा वर्षाका कारण अंक बाँड्दै ७ अंकमा भारत समूह एको विजेता बन्दै सुपर ८ मा पुगेको थियो। सुपर ८ मा पनि भारत अपराजित रहँदै समूह १ को विजेता बनेको हो।
प्रतिक्रिया