लगानी बोर्डले भारतीय कम्पनी एनएचपीसीलाई पश्चिम सेतीको सर्वेक्षण अनुमतिपत्र जारी गरेको छ।
बोर्डका अध्यक्ष सुशील भट्टले एनएचपीसीका डीजीएम अशोक कुमार जोशीलाई लाइसेन्स हस्तान्तरण गरे। साथै उनले तोकिएको समयभित्र अध्ययन पूरा गर्न आग्रह पनि गरे।
७५० मेगावाटको पश्चिम सेती जलविद्युत आयोजनाको प्रारम्भिक प्रतिवेदन तीन महिनाभित्र र प्रारम्भिक प्रतिवेदन बुझाएपछिको २१ महिनाभित्र डीपीआर पेश गर्नुपर्नेछ।
भारतीय कम्पनी एनएचपीसी लिमिटेडले पश्चिम सेती जलविद्युत् परियोजनाको सर्वे लाइसेन्सका लागि लगानी बोर्डमा निवेदन दिएको थियो।
गत भदौ २ गते लगानी बोर्ड र एनएचपीसीबीच ७५० मेगावाट क्षमताको पश्चिम सेती र ४५० मेगाट क्षमताको सेती नदी ६ परियोजना अघि बढाउने सम्झौता भएको थियो।
ती दुवै आयोजना वर्षौँदेखि अलपत्र रहँदै आएका छन्। बोर्डका प्रमुख कार्यकारी अधिकृत सुशील भट्ट र एनएचपीसीका अध्यक्ष एके सिंहले सम्झौतापत्रमा हस्ताक्षर गरेका थिए।
सोसँगै कम्पनीले सर्वे लाइसेन्सका लागि आवेदन हालेको हो।
प्रस्तावित ७५० मेवा जडित क्षमताको जलाशययुक्त पश्चिम सेतीको लागत १ अर्ब ३२ करोड अमेरिकी डलर अनुमान गरिएको छ। त्यस्तै ४५० मेवा क्षमताको सेती नदी ६ को अनुमानित लागत ८० करोड डलर छ।
यो आयोजना डोटी, डडेल्धुरा, बैतडी र बझाङ हुँदै बग्ने पश्चिम सेती नदीमा निर्माण हुने भनिएको छ।
Shares
प्रतिक्रिया